गजलः निराश किन...

निराश! किन यति धेरै हुन्छौ त लाटी ?
केही दिनमै आउछु के!, रुन्छौ त लाटी ??

तिमी आॅफै बुझिहाल्छौ मेरै मनको कुरा पनि,
निराशामा कसको कुरा सुन्छौ त लाटी ??

मीठा सपना नदेख्नलाई भन्या छु र मैले ?
बियोगको यस्तो स्वप्न बुन्छौ त लाटी ??

भूगोल भिन्न भए पनि मनको दुरी हुन्न प्यारी !
मनमा एउटा राखी देउता चुन्छौ त लाटी ?

पवित्र छ यो मन मेरो, हुरूक्क छ तिमी प्रति,
तिम्रो चोखो मनले यो दील छुन्छौ त लाटी !!

रचना मिति ७४ ६ ८

गजलः प्रेमयुक्त दरबार हेर !!

अरु अस्त्र के चाहियो र जोड्नलाई घरबार हेर !
सँगै मिली बनाएको प्रेमयुक्त दरबार हेर !!

प्रेमपंखी घोडा चडी उडौ आऊ गगनमाथी,
दुनियाँले खै के भन्ला, छैन कुनै दरकार हेर !!

कस्ले छेक्ने साहस गर्ला अब हामी दुबैलाई
प्रेमयुद्ध सँधै सँधै हारेको यो सरकार हेर !!

निर्रथक हुन्न कान्छी, प्रेमपूजा कैल्यै पनि,
प्रेमयुद्ध लड्न ठीक्क पारेको यो तरबार हेर !

आफ्नो भन्दा बढी माया हुँदो रैछ दील भित्र,
जनार्दनको आँखाबाट प्रीत भरी संसार हेर ।।

रचना मिति २०७५/०४/२३

गजल : छर्न सक्दिन रे चाँदनीले

आज आफ्नो आभा छर्न सक्दिन रे चाँदनीले

परैबाट मन हर्न सक्दिन रे चाँदनीले

रिसाएरै बस्या हौ कि ! तिम्रो कान्ति कता गयो ?

मुहारमा कान्ति भर्न सक्दिन रे चाँदनीले

सविताको उजेलीलार्इ धरतीले छेकेपछि

चम्की आँफै दिप्ती छर्न सक्दिन रे चाँदनीले ।

एकै क्षण त छेकिदिन्छ रश्मीलार्इ, बुझिनौ के ?

बुझेपनि धैर्य गर्न सक्दिन रे चाँदनीले ।

अल्लि पर सर नानी ! उज्यालो त भेटिइहाल्छ

बेला नभै अन्त सर्न सक्दिन रे चाँदनीले ।

                         रचना मिति -२०७५/०४/११ गते

गजलः उनको न्यानो...

उनको न्यानो अंगालोमा निदाउन पाए हुन्थ्यो । मायालाई छोप्ने प्वाख फिजाउँन पाए हुन्थ्यो ।।

जीन्दगीमा जित्नु के छ, किन धेरै दौडधुप ?

ठूलो जीत प्रेम नै हो बुझाउन पाए हुन्थ्यो ।।

एक प्याला प्रीतलाई टेबलमा टक्क राखी,

आधा आफै बाँकी उनलाइ पिलाउन पाए हुन्थ्यो ।।

एकनास माया गर्दा झर्काे लाग्ला तिमीलाई !

पियारको भाका फेरी रिझाउन पाए हुन्थ्यो ।।

जनार्दनलाई दिन्छौ कि त बास बस्न मुटुभित्र !

कस्तो होला दिल तिम्रो चिहाउन पाए हुन्थ्यो ।

काफिया र रदीफ...

काफिया र रदीफ बिना गजल हुदैन ।
 वाह वाही नभै गजल सफल हुँदैन ।।

मिसरालाई राम्रोसँग श्रृंगारले भर्नु पर्छ,
 बहरबद्ध नभै ‘शेर’ असल हुँदैन ।।

श्रृंगारिकता हुन्छ भन्छन् गजलभित्र धेरैजसो,
पैल्हा प्रीति नभै नयन सजल हुँदैन ।।

लेख्नै पर्छ दुई चार वटा आँफै निखारिन्छ,
 बिना परिश्रम कुनै फसल हुँदैन ।

‘जनार्दन’ ले कैलेकाँही तखल्लुस राख्ने गर्छ,
 तखल्लुस नभएनि बिफल हुँदैन ।  
रचना मिति २०७४ .१२. २७

गजलः दिनै भरी मैयासँग होलीमा क्या रमाइलो भो...

दिनै भरी मैयासँग होलीमा क्या रमाइलो भो ।

लोला अनि अबिर भर्ने सोलीमा क्या रमाइलो भो ।।

किन होला अन्त तिर ध्यानै मेरो जाँदै जान्न

कटाक्षले ताकी हान्ने गोलीमा क्या रमाइलो भो ।।

रंग दल्दा भयो स्पर्श, ठूलै झड्का लागि हाल्यो,

टाकुरा बीचमा बग्ने खोलीमा क्या रमाइलो भो ।।

लक्ष्य आँफै बुझे राम्रो, होली त यो बहाना हो,

मीठो प्रीति भरिएको झोलीमा क्या रमाइलो भो ।।

भिजे पछि अलिअलि पारदर्शी बनिहाल्छ,

निथ्रुक्क भै भिजेको त्यो चोलीमा क्या रमाइलो भो ।।

गजलः पुछें ऐना धुलो देखी...

 मुहारमा कालो थियो, पुछें ऐना धुलो देखी 

अरु सबै झिना झाँक्रा आफू मात्र ठूलो देखी 

माछा देख्दा दुला भित्रै हात हाल्न उद्धत थिएँ,

झट्ट हात बाहिर झिकें, सर्प भाको दुलो देखी ।।

दान, पुण्य, मानबता, धर्म कैल्यै सोचिएन,

मज्जा मानें दुनियाँको चिसिएको चुल्हो देखी ।।

कुन हो राम्रो, नराम्रो कुन केको मतलब थियो र खै ?

कुकर्मकै आड भित्र सम्पत्तिको कुलो देखी ।।

सुन्दरी र मदिराको नशा भित्र बित्यो जीवन,

मनका सच्चा रुपसीको आँखा भित्र फुलो देखी ।।

२०७४ । ११ । ११
pc: www.goalcast.com

गजलः सोह्रसृङ्गार गराैं अब कसको लागि ?

मन लगाई सोह्रसृङ्गार गराैं अब कसको लागि ?

हृदयमा स्वागत घडा भराैं अब कसको लागि ??

प्यारो मान्छे भेट्न भन्दै गैरी खेत झर्थें सधैं ,

याद साँची गोधुलीमा झरूँ अब कसको लागि ??

साँच्चै तिमी आँउदैनाै– थाहा पाइसके पछि,

बाटोभरी फूलै फूल छरौं अब कसको लागि ??

तिमीबिना फूल पनि मुर्झाएरै बस्ने गर्छ,

मुस्कुराउँनु सुन्दर फूलहरू अब कसको लागि ??

सँगै जिउने सँगै मर्ने बाचा पनि गरेकै हो,

बाचा सम्झी जिउँदैमा मरूँ अब कसको लागि ??

२०७४/०९/२७

गजलः वसन्तमा कोइली गाउँछ, अनि तिम्रो याद बढ्छ

वसन्तमा कोइली गाउँछ, अनि तिम्रो याद बढ्छ,
बगैचामा बहार छाउँछ, अनि तिम्रो याद बढ्छ ।।

प्रेमालाप गर्दै ढुकुर आफ्नै अघि प्रीती साट्छन्,
देख्दा त्यसै न्यास्रो लाउँछ, अनि तिम्रो याद बढ्छ ।।


तिमी छैनौ, केही गर्ने जाँगर चल्नै छोडी हाल्छ,
केही गर्ने कत्ति ठाँउ छ, अनि तिम्रो याद बढ्छ ।।

बिछोडको पीडालाई कुन शब्दले पोखौ र म ?
मलम छैनौ,  मात्रै घाउ छ, अनि तिम्रो याद बढ्छ ।।

कस्तो होला पैलो भेट एकान्तमा तिमीसँग !
अंगालोमै कस्ने दाउ छ, अनि तिम्रो याद बढ्छ ।।
2074/09/19

गजलः झिल्को लिई सारा बन डढाउनेलाई चिन साथी

झिल्को लिई सारा बन डढाउनेलाई चिन साथी
आफ्नालाई आँफैसँग लडाउनेलाई चिन साथी ।।१।।

चिन्नु र्पछ समयमै दैब हो कि राक्षस त्यो,
मित्रता कि दुष्मनी हो बढाउनेलाई चिन साथी ।।२।।

विवेकले काम गर्नु प्रतिफललाई सम्झिएर,
बुद्धि भुटी कुबुद्धिमा सडाउनेलाई चिन साथी ।।३।।

धान रोपे धानै फल्छ, कोदो रोपे फल्छ त्यही,
आफल्ने कुन ? अनि धाम चढाउनेलाई चिन साथी ।।४।।

गुरुमाथि भर पर्छ कस्तो गन्तब्यमा जाने,
शास्त्र भन्दै इन्द्रजाल पढाउनेलाई चिन साथी ।।५।।

२०७४/०८/१९

गजलः मायालुकाे केश ...

मायालुकाे केश जब बतासले छुन्छ,
मेराे मनले सधैं भरि उनी लाई नै चुन्छ ।


चिसाे बतास सर्सराउदा हल्लिएका पुष्पपत्र,
मायालुले आफ्नै ओठ चलाए झैं हुन्छ ।



एका तर्फ हाम्राे मिलन अर्काे तर्फ याे चाँदनी
उनैलाई इर्ष्या गर्ने आकाशमा जुन छ  ।

कसी लाउनै पर्दैन हाे, अकबरी सुन भए
मायालुकाे पीयारमा अकबरी सुन छ

अधरकाे मीठाे नशा, अनि न्यानाे अालिंगन
साँच्चै भन्या संसार नै  बिर्सिदिउँ झैं हुन्छ ।

2074/09/11

गजलः अाफ्नै जस्ताे ठानी...

आफ्नै जस्तो ठानी दिलमा बस्ने बसाउने
जस अपजस कस्को हुन्छ ? फस्ने फसाउने


दिल लिनु, दिल दिनु ठट्टा मात्र कहाँ हो र ?
मायालुलाई अंगालोमा कस्ने कसाउने ?


त्यस्तै त हो शुरु शुरु केही गफ त दिनै पर्यो,
कोही कोही त ठूलै हाँक्छन्  तारै खसाउने

सहयात्रा – पुर्वाधार भन्नु राम्रो जस्तो लाग्छ,
दर्द देख्दा मायालुको आखै रसाउने ।

सुख मिल्यो एउटालाई अर्कोलाई  खुसी लाग्ने
किन हुन्न पिरतीमा हाँस्ने हँसाउने ?

2074/09/11

गजलः के दिएर फिर्ता मागौं

के दिएर फिर्ता मागौं बालापनको साटो, 

नगुम्थ्यो त कति जाति  जीन्दगीको – पाटो  ।

अभाव नि थिएन क्यै, थिएन क्यै बिलाशिता

जे खाँदा नि मीठो हुन्थ्यो ढींडो होस् या आँटो ।

कति खुसी दिन्थे हेर सानो प्राप्ति पनि सधैं 

जीवन उमङ्गमा रम्थ्यो, खेले पनि माटो ।

स्पर्धामा उछिन्नलाई हेरिएन फर्किएर,

कति धेरै सफर  गरी काटिएछ बाटो ।

कयौं याम पार भए जन्मदिवस मनाउँदै,

जीन्दगीको धुरी हेर्छु मक्किएछ भाटो ।

२०७४ )* @^

गजलः उनै सुनैना देख्छु ।

सधैं स्वप्न भित्र उनै सुनैना देख्छु ।
कस्तो अचम्म मित्र उनै सुनैना देख्छु ।

यता कोल्टे फेर्दा फेरि याद बढ्छ,
छ यादगी पवित्र उनै सुनैना देख्छु ।

साथ छुट्टिएको हिजै जस्तो लाग्छ
समय नै विचित्र उनै सुनैना देख्छु

कति विघ्न रैछ पखेरुको ख्याल ?
भएरै सत्चरित्र उनै सुनैना देख्छु

दैब लागे  नि के भो छ सम्झना भित्र।
कल्पिन्छु केहि छिन उनै सुनैना देख्छु ।।

 २०७४/०८/१३

photo courtesy : eyewillnotcry.wordpress.com

गजलः बदन तिम्रै भयो कान्छा मनोमानी गरे हुन्छ ।।

चोखो प्रीति वर्षाउने कुराकानी गरे हुन्छ,
जाेबन तिम्रै भयो कान्छा मनोमानी गरे हुन्छ ।।

उता तिम्लाई पट्याउलान, लोभ लालच देखाउलान,
यता तिम्रो म छु कान्छा, आनाकानी गरे हुन्छ ।।

तन, मन धन, सुम्पी, तिम्रै घरको इज्जत बन्छु
मलाई सम्झी अरुसँग बेइमानी गरे हुन्छ ।।

मैले आफ्नो प्रीयतमकाे उँच नीच सहिदिउला
जति गर्नु मलाई नै छेडखानी गरे हुन्छ ।।

छैन दुरी हामी माझ, सँगै हुँदा हुन्छ गल्ती
मीठो लाग्ने त्यस्तो गल्ती जानी जानी गरे हुन्छ ।

२०७४/०८/०४

गजलःत्याे बैंशकाे मीठाे नशा पिएर गल्ती गरें

त्याे बैंशकाे मीठाे नशा पिएर गल्ती गरें .

केही नसोची यो मुटु दिएर गल्ती गरें ।।

उनी अलि दुःखी हुँदा, दुःख छोप्ने मलम बनी

खुसी खोजें, अनि दुःख सिएर गल्ती गरें ।।

यस्तै भयो प्रेमकथा, नछुटिने बाचा बाँधी

बाचा उस्तै उनीसँग लिएर गल्ती गरें ।।

सधैं एकै कहाँ हुन्छ, मानिसको स्वभाव त <

अाफ्नैलाइ छली,  आँफै खिएर गल्ती गरें ।।

सँगै हिड्न त सम्झौता गर्नु पर्थ्याे नि क्यै कति   

दिलै तोडेर  लाै, एक्लै जिएर गल्ती गरें ।।

२०७४/०७/२३

गजलः पूर्व हो कि पश्चिम जाँऊ ?

पूर्व हो कि पश्चिम जाँऊ ? भन प्रिय तिमी आँफै ।
शान्ति मिल्ने कुन हो गाउँ ? भन प्रिय तिमी आँफै 

ढाँट छली धेरै बढ्यो अमृत भन्दै बिष बेच्छन्
अमृत हो कि बिष खाँउ ? भन प्रिय तिमी आँफै । 

नैतिकता सिकाउनलाई कस्तो तालिम दिनु पर्छ ?
नजोत्नेलाई किन दाउँ ? भन प्रिय तिमी आँफै ।

चुहिरह्यो मनको छानो यो आत्मामा ओत छैन
मनमा कस्तो छानो छाँउ?  भन प्रिय तिमी आँफै ।

जनार्दनको कुरालाई किन कस्ले बाल दिन्थ्यो ?
के भनेर सँधै धाउँ ? भन प्रिय तिमी आँफै ।

२०७४/०७/२२

गजलः कसले भन्यो पैसा फल्ने रुख छ रे खाडीमा ?

कसले भन्यो पैसा फल्ने रुख छ रे खाडीमा ?
बरू खेतमै सुन फल्थ्याे बदलियो झाडीमा ।।

सँगै बसी आँटो पिठो खाउला भन्ने सपना थियो
दुलही बनी सजिई आउँदा – बनारसी साडीमा ।।

तिमी गयौ खुसी छोडी, सुख खोज्न परदेशमा
यता आफ्नो सपना बग्यो गैरी खेत झैं बाढीमा ।।

आऊ प्यारा ! फर्की आऊ, सम्झी आफ्नो मातृभूमि !!
युवा शक्ति बिना देश, लिलाम हुन्छ कबाडीमा ।।

तिम्रो तागत धेरै खच्र्यौ मरुभूमि सिंगार्नलाई
आफ्नै देशमा पौरख गरौं बल छदैं नाडीमा ।।

२०७४/०७/२१ 

गजलः अलि ढीला गरी आउनुभो नि हजुर

अलि ढीला गरी आउनुभो नि हजुर
फाइदै नभै क्यै धाउनुभो नि हजुर ।।

भनेकै होे गर्नु,  जे गर्ने बेलैमा
बेमौसमी गीत गाउनु भो नि हजुर ।।

के रह्यो र मोल लगन पछिको पोते
ब्यर्थै दुःख पनि पाउनु भो नि हजुर ।।

बिन्ती भुली दिनु सगैं हिड्ने स्वप्न
मात्र यादमा जो छाउनुभो नि हजुर 

 २०७४/०७/१९

गजलः लाग्छ कतै शहर भित्र माेज देखिन्छ...

लाग्छ कतै शहर भित्र माेज देखिन्छ । 

के को खुसीमा हाे कुन्नि,  भाेज देखिन्छ । 

लाटा साेझा हराउने घरैघरकाे  जंगल  भित्र

दाैड्धुप र  खिचातानी हर राेज देखिन्छ ।

जे गर्नु छ गर्छ त्यही रूपैयाँले साथी 

हर क्षेत्रमा अमीरीकाे अाेज देखिन्छ । 

किन छैन शहर  भित्र अभाव र पीडा साथी ? 

भाव बिना बाँच, जीवन बाेझ देखिन्छ । 

कस्ताे अनुभुति हाेला द्रष्टा दैबप्रति  कुन्नि ??

 तस्वीर भित्रै हाँसाे लग्ने पाेज देखिन्छ ।।

रचना मिति २०७४/०७/१७