गजलः साँझपख फूलबारीमा हाँस्छु भन्यो गुलाबले

 साँझपख फूलबारीमा हाँस्छु भन्यो गुलाबले

खिलखिलाउदै मीठो प्रिति गाँस्छु भन्यो गुलाबले ।।१।।

हराभरा बाग माझ लहराउदै मुस्कुराउदै,

सुवासिंदै आफ्नो सुवास बाँड्छु भन्यो गुलाबले ।।२।।

झोंका सितल पवनको काउकुति लगाइदिने,

काउकुतिमै फुरूङ्ग भै नाच्छु भन्यो गुलाबले ।।३।।

नशालु छ चन्द्रमाको रोशनी त्यो आज किन,

हराएर नशा भित्र बाँच्छु भन्यो गुलाबले ।।४।।

 लोभिएछ शान्तिप्रिय उनको त्यही माधुरीमा

जीवन सँगै काटौ भन्यो, 'आँट्छु' भन्यो गुलाबले ।।५।।

गजलः .... काग हुँदो रैछ

 चन्द्रमाको बिच पनि दाग हुँदो रैछ

सबै कुरा आफ्नो आफ्नो भाग हुँदो रैछ ।।१।।

बाचा कसम जले पछि डढेलो भो देह,

पिरतीमा जली जीवन खाग हुँदो रैछ ।।२।।

संगीतको मल्हमले भर्छ मन भन्थे कोही

त्यही संगीत मृत्यू गीत राग हुँदो रैछ ।। ३।।

बियोगमा छटपटिदा बसन्तको हरियाली

शिशिरको उजाडिदो बाग हुँदो रैछ  ।।४।।

दुर्भाग्यको रास आफ्नो भाग परे पछि

कोइली पनि कुन्नी किन काग हुँदो रैछ ।।५।।

(पुरानो गजल)