गीतः मेरो माया हेर आज...

मेरो माया हेर आज जुन बनी आँउदैछ,
सातै सुर सरगमको धुन बनी आँउदैछ ।।

त्यो छातीमा लुटपुटिदै, कति होला मनोमानी,
लाज केले छोप्नेहोला बिउँझिदा त्यो बिहानी,
अधर फुल्ला ढकमक यस्तो बहार छाँउदैछ,
लजाउने गुलाबलाई छुन भनी आउँदैछ ।।

स्वागतमा  म उनको अब   केके गराै भनीदेउ

सृ‌‌गारेर लौ न  सखी मलाई   आज सजाइदेउ

मायालाई भेटी मीठो प्यास मेट्न धाउँदैछ

साइनो जाेडी आज  मलाई लिन भनी आँउदैछ ।। 

लाग्छ एकै ढुकढुकीमा दुई मुटु चल्छ होला,
पियारको बगैचामा बैसको फूल फुल्छ होला,
मेरो मनले कति मीठो उनको गीत गाँउदैछ,
त्यै गीतमा सास भर्न संगीत बनी आँउदैछ ।।

मेरो माया हेर आज जुन बनी आँउदैछ ।
सातै सुर सरगमको धुन बनी आँउदैछ ।।