Wednesday, February 12, 2020

सोह्र सृंगार नेपालको ...










सोह्र सृंगार नेपालको मेरी मायाको झैं लाग्यो
भुषण हिमालको हेरी मायाको झैं लाग्यो ।। १।।

शीरको टोपी मुस्कुराउँछ, लाली छर्दै बिहानीमा,
स्वागत् घडा भरी  हाँस्दा, खेरी मायाको झैं लाग्यो ।। २।।

सरगम त्यो बतासको, छहराको ताल छोपी
कति मीठो धुन यो फेरि मायाको झैं लाग्यो ।। ३।।

रेशमको बुट्टेदार  फरिया  र लोभ लाग्दो,
पहाडको बान्कीलो पच्छेरी मायाको झैं लाग्यो ।।४।।

पवित्रता बोकी कलकल  गर्दै संगीतमय यात्रा
मेची काली कर्णाली र भेरी मायाको झैं लाग्यो ।।५।।

मन्दिर भेट्छु मस्जीद भेट्छु, जँहा जतै पुगेपनि
स्नेहयुक्त ममता मझेरि मायाको झैं लाग्यो ।। ६।।

समृद्धिको सुन फल्ने मधेश मेरो मातृभूमी
यस्को सजावट हेर्दै खेरी मायाको झैं लाग्यो ।। ७।।

--  रचना मिति २०७६।१०।२९ गते । 
राजविराज, नेपाल

Tuesday, February 19, 2019

गजलः हिसाब चाहिन्छ ।


यो थैली जनताको हो, हिसाब चाहिन्छ । 
के गर्यौ, कसो गर्यौ जवाफ चाहिन्छ ।



सुशासन भन्छौ, पारदर्शिता भन्छौ,
अन्याय भो सरकार ! निशाफ चाहिन्छ  ।

राम्रै गर्छौ, यहि सोची पठा’को हो तिम्लाई, 
सत्ता सम्हाल्नलाई पुरै होस हवास चाहिन्छ ।

सरकार ! किन आत्तिन्छौ जवाफ माग्दा, 
जनतासँग प्रस्तुत हुन मिजास चाहिन्छ । 

सत्तासँगै घुम्छ भन्छन् शक्ति तथा सम्पत्ति नि !
भोका जनार्दनलाई गाँस बास, कपास चाहिन्छ

रचना  मिति २०७५/११/०७ 
इलाम ।

Thursday, February 14, 2019

लघुकथाः भ्यालेनटाइन ।


उतीबेला भ्यालेन्टाइन डे हुन्छ भन्ने थाहा थिएन, प्रेममा परेपछि त्यो पनि थाहा भयो । प्रेम गर्न, प्रस्ताब राख्न तथा प्रेमको स्वीकारोक्तीका लागि कुनै दिवसको आवश्यकता नै पदैनथ्यो । प्रेमालापयुक्त सबै दिनहरु भ्यालेन्टाइन डेज हुन्थे तथापी भ्यालेन्टाइन डे त अझ स्पेशल ।


यसै प्रसंगमा मलाई प्रेमप्रस्ताब स्वरुप प्राप्त भएको प्रथप पत्रको अति नै संझना आईरहेछ । त्यसमा भएका शब्दहरु यति मिठासपूर्ण, आग्रहपुर्व, कोमल र मायालु थिए नि  ! त्यसको कुनै वर्णन नै सम्भव हुदैन । शायद मैले धेरै पटक पढेको कृति यही नै होला । तर त्यो प्रेमपत्रको मैले कुनै जवाफ दिइन । कारण प्रेम स्वीकार गर्न कुनै पत्रको आवश्यकता नै परेन । फेरि त्यति मीठा, मधुर शब्दको जवाफ त्यति नै ओजनदार हुनु पर्दथ्यो त्यो क्षमता मसँग थियो या थिएन भन्न सक्दिन । जे होस हाम्रो प्रेम बिना लिखित स्वीकारोक्ति शुरु भयो । त्यसबेला उक्त प्रेम सम्बन्धलाई सार्वजनिक रुपमा प्रकट गर्न हामी दुबैलाई साहस पुगेन ।  धेरै समय पछि उनले के बुझेर हो उक्त पत्र  मबाट फिर्ता मागेर मैले थाहा नपाउने गरी च्यातिदिइन् (तर मैले थाहा पाइ हालें)सँगै मेरो मन पनि ।  त्यसपछि  पनि उनले प्रेम नै गरिरहेको नाटकीय मल्हम गरिरहिन् र मैले पनि त्यसैमा चित्त बुझाइदिएँ । यसरी हामी करीब सात वर्ष गुज्रियौ ।  सात वर्ष पछि मैले नै हाम्रो पवित्र प्रेम सम्बन्ध समाप्त भएको घोषणा गरिदिएँ । त्ये कुनै प्रेम थिएन थियो त केबल आकर्षण । सायद उनको मनको चाहना नै बुझेर मैले त्यसो गरें भन्ने लाग्छ ।

त्यसपछि मैले बिना कुनै प्रेम÷ प्रेमप्रस्ताब बिवाह गरें र बिबाह गरेकी कन्यासँग प्रेम गर्न लागें । त्यसो गर्दा पनि कुनै विशेष दिवस आवश्यकता परेन । । प्रेमालापयुक्त सबै दिनहरु भ्यालेन्टाइन डेज हुन्थे, हुन्छन् र हुनेछन्  । पछिल्लो प्रेममा कुनै पत्र आदान प्रदान भएन र कुनै नाटकीय मल्हम पनि चाहिएन । अहिले आएर लाग्न थालेको छ पहिलेको प्रेम भ्यालेन्टाइन स्पेशल लब रहेछ र अहिलेको प्रेम स्पेशल लब अफ अल टाइम ।
- १४  फेब्रुअरी २०१९

Thursday, February 7, 2019

गजलः सुस्तरी आऊ कान्छी


धड्कन कसैले सुन्ला, सुस्तरी आऊ कान्छी
देखेर कस्तो ठान्ला, सुस्तरी आऊ कान्छी ।।

जुनी भरी तिम्रो निश्वास सुन्नलाई मञ्जुर छ,
सँगै जीवन बिताउला, सुस्तरी आऊ कान्छी ।।

आतुर छौ आफैलाई मभित्र नै लुकाउन ।  
म बाहु फैलाइरहुला, सुस्तरी आऊ कान्छी ।।

थाहा छैन अधर तिम्रो मोहनी कि मधुपर्क,
त्यो अधर पान गरौला, सुस्तरी आऊ कान्छी ।।

दुनियाले जेजे सोचोस् केको मतलब छ र यहाँ
दुई मुटु एकै बनाउला, सुस्तरी आऊ कान्छी ।।

रचना मिति २०७५/१०/२२



Sunday, December 30, 2018

गजलः नभन्नु है कसैलाई ।


मनले त्यो मन  चुनेको, नभन्नु है कसैलाई ।
दीलको धडकन हो सुनेको, नभन्नु है कसैलाई ।।

ईर्श्या गर्न सक्छन् कोही, प्रेमालाप देखे भने,
"प्रीत हुन्न दील नहुनेको" नभन्नु है कसैलाई ।।

कोमल तिम्रो  ह‌ृदयमा चोट लाग्ला कैलेकाँही
जतनले कलेजी तुनेको,  नभन्नु है कसैलाई ।।

आफ्नो  लागि रूने मान्छे चिनिसके  पछि 
भर हुन्न है रुनेको, नभन्नु है  कसैलाई ।।

बुन्दिरैछौ गलबन्दी, मलाई नै स‌म्झिएर 
तर कसलाई हो बुनेको, नभन्नु है कसैलाई ।।



Thursday, December 13, 2018

गजलः किन सुन्थ्यो सरकार तिम्रो रोदनका कुरा

किन सुन्थ्यो सरकार तिम्रो रोदनका कुरा ?
तौलबिहिन जनताको हुन्न ओजनका कुरा ?

आँफै हत्या र बलात्कारमा संलग्न हुन्छ,
अनि गर्थ्यो दोषीलाई अभियोजनको कुरा ?

काँचै निल्छ सुलुत्त, पचाएकै छ अझ सम्म
त्यसैले त गर्थ्यो किन प्रशोधनका कुरा ?

झुत्रो, मैलो, जे छ त्यही ठीकै रैछ उसको लागि
अनि किन गर्छ कोही रंग रोगनका कुरा ??

न्याय, अन्याय छुट्याउने आँखा भए देखि
किन गर्छ न्यायपूर्ण समायोजनका कुरा ??


Wednesday, December 5, 2018

गजलः कसम ! प्यारी साथै हुँदा रिक्सा मर्सिडिज बन्छ

संकल्प र धैर्यताले मात्रै सबै चिज बन्छ।
परागसेचन भए पछि फूल पनि बीज बन्छ ॥१॥

एकै नास कहाॅ होला जो कसैको परिस्थिति!!
साेल्युसन भयाे भने साबुन पनि फिंज बन्छ ॥२॥

कुमालेको चक्र जस्तै घुमिरन्छ भाग्य पनि,
परिश्रम पछि पुअर पक्कै एक दिन रीच बन्छ ॥३


फगत सोचमा सिमित रैछ सुख दुख भन्ने कुरा,
सुख सम्झे
माई सरो कति चाडै हिज बन्छ ॥४

बरू एउटा सहयात्री भेट्यौ भने तिम्ले कतै,

कसम ! प्यारी साथै हुँदा रिक्सा मर्सिडिज बन्छ ॥५


Tuesday, September 25, 2018

गजलः निराश किन...

निराश! किन यति धेरै हुन्छौ त लाटी ?
केही दिनमै आउछु के!, रुन्छौ त लाटी ??

तिमी आॅफै बुझिहाल्छौ मेरै मनको कुरा पनि,
निराशामा कसको कुरा सुन्छौ त लाटी ??

मीठा सपना नदेख्नलाई भन्या छु र मैले ?
बियोगको यस्तो स्वप्न बुन्छौ त लाटी ??

भूगोल भिन्न भए पनि मनको दुरी हुन्न प्यारी !
मनमा एउटा राखी देउता चुन्छौ त लाटी ?

पवित्र छ यो मन मेरो, हुरूक्क छ तिमी प्रति,
तिम्रो चोखो मनले यो दील छुन्छौ त लाटी !!
रचना मिति ७४ ६ ८

Wednesday, August 8, 2018

गजलः प्रेमयुक्त दरबार हेर !!

अरु अस्त्र के चाहियो र जोड्नलाई घरबार हेर !
सँगै मिली बनाएको प्रेमयुक्त दरबार हेर !!

प्रेमपंखी घोडा चडी उडौ आऊ गगनमाथी,
दुनियाँले खै के भन्ला, छैन कुनै दरकार हेर !!

कस्ले छेक्ने साहस गर्ला अब हामी दुबैलाई
प्रेमयुद्ध सँधै सँधै हारेको यो सरकार हेर !!

निर्रथक हुन्न कान्छी, प्रेमपूजा कैल्यै पनि,
प्रेमयुद्ध लड्न ठीक्क पारेको यो तरबार हेर !

आफ्नो भन्दा बढी माया हुँदो रैछ दील भित्र,
जनार्दनको आँखाबाट प्रीत भरी संसार हेर ।।

रचना मिति २०७५/०४/२३













Friday, July 27, 2018

गजल : छर्न सक्दिन रे चाँदनीले











आज आफ्नो आभा छर्न सक्दिन रे चाँदनीले
परैबाट मन हर्न सक्दिन रे चाँदनीले

रिसाएरै बस्या हौ कि ! तिम्रो कान्ति कता गयो ?
मुहारमा कान्ति भर्न सक्दिन रे चाँदनीले

सविताको उजेलीलार्इ धरतीले छेकेपछि
चम्की आँफै दिप्ती छर्न सक्दिन रे चाँदनीले ।

एकै क्षण त छेकिदिन्छ रश्मीलार्इ, बुझिनौ के ?
बुझेपनि धैर्य गर्न सक्दिन रे चाँदनीले ।

अल्लि पर सर नानी ! उज्यालो त भेटिइहाल्छ
बेला नभै अन्त सर्न सक्दिन रे चाँदनीले ।

                         रचना मिति -२०७५/०४/११ गते