नयाँ वर्ष

यस्तो चिसो मौसममा
किन आयौ?
के वसन्तको हरियाली मन पर्दैन?
कि कोइलीको सुरिलो स्वरले झर्को लाग्छ?
खै ! तिमी आएको
मलाई त खासै मन परेन ।

हुन त तिमीले डलर खुब कमाएर ल्यायौ होला
तिमी सॅग आइ एन जि ओ ले दिएको सवारी होला
चिसो छेक्न सक्ने
ए सी युक्त ।
सयद तिमी शक्तिसम्पन्न छौ
र त सास्कृतिक रूपमा अरूलाई परास्त गर्न सक्छौ ।
globalization को हतियार लिएर ।
धर्मनिरपेक्षता र
मानब अधिकार
अनि समावेशीकरण आदि आदिका
ढाल लिएर ।

हुन त हामी पनि उस्तै छौ,
हिन्दी प्रति हुरूक्कै हुन्छौ ,
दौरा सुरुवालमा भन्दा टाई सुटमा भलाद्मी सम्झन्छौ
आफ्नै सॅस्कृतिलाई सराप्छौ
इतिहासलाई धारे हात लगाउछौ
राष्ट्रिय विभुतिलाई थुक्छौ
क्रीसमसमा सार्वजनिक छुट्टी दिन्छौ र
हाम्रो आफ्नै चाड पर्वहरूलाई छुट्याउछौ
यो फलाना र ऊ ढिस्काना जातको भनेर ।
अनि आफ्नो मौलिकतालाई अवमूल्यन गर्छौ ।

जे भए पनि तिमी आए पछि
स्वागत गर्नै पर्यो ।
चिन्ता नगर!
हाम्रो सरकारले
तिम्रो आगमनलाई केही बर्ष भित्रै
सार्बजनिक विदा गरेर औपचारिक स्वागत गर्नेछ
बैसाख 1 लाई गोली मारेर ।