सरस्वती बन्दना

देवी तिम्रो कसरी महिमा गाउँ अज्ञानी मैले
 विद्या ज्ञान कसरी सहजै प्राप्त र्गछन सबैले
 तिम्रो स्नेह मकन भरिद्यौ हेरी अज्ञानीलाई
 गर्छु सेवा सरस खुसीले प्रार्थना तिम्रो गाई ।१।

  

ब्रह्मा विष्णु सकल गणले गर्दछन् तिम्रो  ध्यान
तिम्रै दृष्टि मकन गरिद्यौ आँउछ बल्ल ज्ञान
विणा हुन्छ जसरी करमा बाद्य तिम्रो सुरिलो
गर्छु पूजा हर समयमा बुद्धि देऊ भरिलो ।।२।।

माला तिम्रो सकल करमा ज्ञानको ज्योति छर्ने
वर्ण शुभ्र असल अति  नै  रात्री अँध्यारो चिर्ने
चक्षुमात्र गहन बढीया बेद, शास्त्र मिमांशा
झुक्छु  नित्य  मनन गरदै राखी अत्यन्त आशा ।।३।।

बस्त्र सेतो कमल दलमा आसन तिम्रो खुल्छ
तिम्रो पाउ परिकन अब मेरो विज्ञान  खुल्छ
बाह्रै रुप नूतन समझी तिम्रो स्तुति गाई
माग्छु जान  हर समयमा देऊ न लाै मलाई ।।४।।

ज्ञानी बन्छन् कसरी  भन लौ हिजो थिए  गवार
जस्मा पर्यो ममता उनको  ज्ञान हुन्छ सवार
भक्ति तिम्रो चरणतलमा मेरो कर्मले बोल्छ
युक्ति तिम्ले जसरी मकन भर्छौ संज्ञान डुल्छ ।।५।।

विद्याकी बरदे बस न मनमा तिमी हौ देवी एक
प्रज्ञा निम्ति मेहेनत गरी माग्छु बुद्धि विवेक
पूजा तिम्रो असल मनले, गर्दछु नित्य कर्म
मेरो प्राप्ति हर प्रहरको, मेरो सत्कार्य, धर्म ।।६।।